Ma lettre au Père Noël
Dans un peu plus d'un mois, c'est..... ???? ben !!! c'est N... c'est NO... c'est NOËL !!!!!
Vous z'avez écrit votre lettre au Père Noël ??? Non, pas encore ??!!!
Voici la mienne (Attention, c'est du Picard ! accrochez vous !!)
Tchot Père Noël
Tchot Père Noël, d’pus qu’ej sus né,
Tu z’zo bien remplis mes soliers !
J’ ai yeu des autos, des tracteurs,
Et pi des jus électroniques ;
J’ai même yeu un ordinateur
Aveuc des logiciels cosmiques…
Tu voès, ej’ n’ai point coère huit ans,
Em’moéson al est plein à ras bord
Ed juets, ed jus, ed bataclan…
Bientôt, feudro coutcher déhors.
Min père i râle tous les matins ;
A chaque pos i s’inpèche ed’dins…
Em mère a n’peut pu baliyer…
Z’on ène moéson pire qu’un poulier !
I vo foloère canger tot o ;
Tchot père Noël, car trop ch’est trop !
Feut canger tin pénier d’épeule
Si tu n’veux point qu’o t’foèche la djeule…
Y o ène cose ec j’ai r’martchée :
Tu rimplis à fond chés c’minées.
Plus al est heute, plus al est belle,
Plus tu n’ninfournes, al main, al pelle…
Chés soliers i sont acouvtés
Edsous des montanes d’patchéts.
Mais ch’ti qu’i n’o point d’ecminées,
Pi point d’moéson, pi point d’soliers,
I n’voét point l’mitan d’un cadeau.
Il o bieu allonger ses bros
Vers ech ciel qui n’y invoét qu’d’el pleuve…
Ed’sous ché ponts I feut qu’i s’seuve
Tchot père Noël, feut t’réveiller !
Canger tout o, vite foét bien foét !
Ch’t’née-chi, passe no c’minée,
Ej t’el edmande, dis acoute-mé.
Déchinds pus bos, dins chés seuelles,
Darrière chés cartons, chés poubelle…
Tu truvéros toutes sortes ed gins
Qui n’ont point mingé à leu faim.
Dépose-leu du gatieu, des vêt’mints,
Des keuchures, des tintes, ed z’abris.
Ed quoi qu’i tyinch’te in momint
In attindant des jours moins gris.
Et pi, à t’vitesse électrique,
Va foère un grand tou in Afrique
In Asie, pi dins chés quat coins
D’ech monde you qu’o crève ‘ed faim.
Donne à minger à ches gins-lo;
Des tonnes ed riz et pi d’sorgho.
In allant vite, t’érosfini
Un peu edvant l’ Epiphanie.
Pi si tout seu tu n’y arrive point,
A ché roés… d’mande donc un keup d’main !